و هذه إحدى روائع الشاعر الذى أعشقه بشكل خاص (أحمد فؤاد نجم) و الذى أراه
واحداً من أبرع من كتب شعر العامية و أكثرهم موهبة
------------------------------------
صرخة جيفارا
جيفارا مات
جيفارا مات
اخر خبر فى الراديوهات
وفى الكنايس والجوامع وفى الحواري والشوارع وع القهاوي وع البارات
جيفارا مات
واتمد حبل الدردشه والتعليقات
مات المناضل المثال
ياميت خسارة على الرجال
مات الجدع فوق مدفعه جوة الغابات
جسد نضالة بمصرعه ومن سكات
لا طبالين يفرقعواولا اعلانات
ما رايكم دام عزكم يا انتيكات
يا غرقانين فى المأكولات والملبوسات
يا دافيانين ومولعين الدفايات
يا محفلطين يا ملمعين ياجسمينات
يا بتوع نضال اخر زمن فى العوامات
ما رايكم دام عزكم جيفارا مات
لاطنطنة ولا شنشنة ولا اعلامات واستعلامات
عينى عليه ساعه القضا من غير رفاقه تودعه
يطلع انينه للفضا يزعق ولا مين يسمعه
يمكن صرخ من الالم من لسعه النار ف الحشا
يمكن ضحك او ابتسم او ارتعش او انتشى
يمكن لفظ اخر نفس كلمه وداع لجل الجياع
يمكن وصية للى حاضنين القضية فى الصراع
صور كتير ملو الخيال والف مليون احتمال
لكن اكيد اكيد اكيد ولاجدال جيفارا مات موتة رجال
ياشغالين ومحرومين يا مسلسلين رجلين وراس
خلاص خلاص مالكوش خلاص غير بالبنادق والرصاص
دا منطق العصر السعيدعصر الزنوج والامريكان
الكلمه للنار والحديد والعدل اخرس او جبان
صرخه جيفار يا عبيد في اى موطن او مكان
مافيش بديل مافيش مناص
يا تجهزوا جيش الخلاص
يا تقولوا على العالم خلاص
11 comments:
شاعر عظيم يكتب عن زعيم عظيم
:))
تحياتي
الفاجومي
هو في حد يقدر يشكك في قدراته
ده من اعظم من كتب بالعاميه
و تكفي افكاره الحره
تحياتي
الله
علي فكرة أنا بموت في القصيدة دي
بالذات لما كان الفضل لأعز أصدقائي في إني أسمعها وأحتفظ بيها بصوت نجم
وإنت كمان كان ليك الفضل في إنك تسمحلي إني أحتف بيها مكتوبة
تحياتي ليكم انتم التلاته
انت وصديقي ونجم
ياااااااااااه
انا بحب جدا احمد فؤاد نجم تحس معاه كدة انك فعلا شامم ريحة مصر وترابها
مصراوى اصيل هو
القصيدة طبعا مش محتاجة رأيي
وبعدين ياعم احمد
هو انت بتختفي كده فين
ماتقوليش إمتحانات وتلاكيك وكلام فارغ من ده
مستنيين جديدك بقي
ماتتأخرش
سلام
يا اهل الله ياللى هنا
الجزء ده :
ياشغالين ومحرومين يا مسلسلين رجلين وراس
خلاص خلاص مالكوش خلاص غير بالبنادق والرصاص
----------------------------------
لما الشيخ امام اخدها ولحنها اتاخدت منه التيمة اللحنية عد كده واتعملت على عبد الناصر في الجملة المشهورة
يا جمال يا حبيب الملايين
----------------------------------
حلوة يا أسامة
انت طبعا عارف نجم عندي يعني ايه
هو انت فيييييييييييييييييين
على فكرة عمنا نجم عمل مدونة وهبقى اجيبلك اللينك
he ya wad ana deeepoooo eh elgamal da
ألله عليك اختيا رموفق خالص مالص
هو فعلا جيفارا مات \
بس مشكلته زي كل العظماء
صعب يموتو بسرعه
Post a Comment